کورونا وائرس کا علاج کرنے والی گولی اس سال دستیاب ہوجائے گی، فائزر

Print Friendly, PDF & Email

فائزر کمپنی کے سی ای او البرٹ بورلا کا کہنا ہے کہ کووِڈ 19 کا علاج کرنے کے لیے ان کی کمپنی میں ایک گولی کی تیاری تیزی سے جاری ہے جو اس سال کے اختتام تک بازار میں دستیاب ہوجائے گی۔ واضح رہے کہ یہ کوئی ویکسین نہیں ہوگی بلکہ کورونا وائرس کا حملہ ہوجانے کے بعد اس کا قلع قمع کرنے والی دوا ہوگی جس کے ابتدائی مرحلے کی طبی آزمائشیں اس سال مارچ میں شروع کی جاچکی ہیں۔ کورونا وائرس کو ختم کرنے کے لیے یہ دوا اس خامرے (اینزائم) کی پیداوار میں کمی کرتی ہے جو کورونا وائرس کو انسانی خلیے میں پہنچنے کے بعد تقسیم در تقسیم ہونے اور اپنا اثر شدید تر کرنے میں مدد دیتا ہے۔ اگر اس دوا کی طبی آزمائشیں کامیاب رہتی ہیں اور امریکی ادارہ برائے غذا و دوا (ایف ڈی اے) اسے بروقت منظور کرلیتا ہے، تو پھر یہ دسمبر 2021ء تک پورے امریکہ میں دستیاب ہوگی۔ فائزر کے مطابق یہ دوا کورونا وائرس سے متاثر ہونے کی اوّلین علامات نمودار ہونے پر دی جائے گی، جسے کھانے کے بعد مریض کو نہ تو اسپتال میں داخل ہونے کی ضرورت پڑے گی اور نہ ہی آئی سی یو کا منہ دیکھنا پڑے گا، بلکہ یہ دوا کھا کر وہ بتدریج صحت یاب ہوجائے گا۔ ماہرین کو امید ہے کہ اس گولی کی آمد سے کورونا وائرس بھی انسانوں کے لیے بالکل ویسا ہی معمولی مرض بن کر رہ جائے گا جیسا آج موسمی زکام ہے۔

Share this: